Italy diaries

اٹلیوتین کوسیکو قصہ

اولانو قسط۔: میلان

دنیا پوشِک بو لوٹ نعمت کوریکو کی ای خور ملکھو پوشیکہ کندوری  نوغ اشناری کی ݯھیݯھین بویان ہتو باریا شور سال رے دی ݯھیݯھین نو بوئے۔ بیکو اوا دی ہیا فراخ ملکھی اسیکہ یورپوتین کوسِکو تانتین فرض جوݰی اسوم وا کورونا گیکن دی تھمامو وقتہ پت کوسیکہ ناغہ گیتی اوشوئے۔ ہاݰ بیتی کوسِک شروغ بیکو سوم اوا دی شینجین ویزوتین درخواست ٹیپتم۔ شینجن ویزہ امبوخ یورپو ممالکانتے کوسیکو بچین ای مکالہ درخواست جمع کوریکو کورونا بو شیر رے جرمانی والہ مہ درخواستو نو مانیکو جوو مکالہ وا جہل کوری ٹیپیکو ۳ ماسوتین ویزہ عنایت ارینی۔ ہیہ ویزو لوو گیکو زیاد تان ملکھو سار ہردی چھیور مگم اوا ہمی مغربی ممالکان قصوروار جاݰومان اسپہ روئے نو جاݰونیان وا ہائی ہل بیکو سوم جوستہ یورپی بوغاوا ویزہ گانیلیک بویان ۸۰ پاونڈ دیتی۔

خیر تھے ہیہ اٹلی رے ملک مہ کریمہ بار اوشوئے بو وقتاری کویکو کی مہ بو ملگیریان اٹلیاری وا ہے ملکھو لوو دیتی مہ بو افسی کوری اسیتانی۔ آخرکار رایانآئیر رے ای سستہ جہازو ٹیکٹان گانی پھار چق ہوتم۔ بیکار پروشٹی رومار ای ملگیری پوندی حسابہ دنیو ژاغان نامان متین انزیتائے وا مہ بیہیل کوری پھار ویݰیتائے۔ ای خوشانی ہیہ دی اوشوئے کی چھتراری ملگیریان وا بفارگینی کائگینی دی اٹلی اسونی ہتیتان پوشیکو بچین دی خوشانی اوشوئے۔ خائے تھے ہاݰ بیتی لندنہ ریلتو نیسی اسٹینڈاسٹیڈ ایرپورٹہ توریتم کورار کی مہ جہاز اولواو اوشوئے۔ ملال بیک مہ دِش مگم لوڑتم کی ۳ گھنٹہ پروشٹی ایرپورٹو اندرینی گیتی اسوم۔ ہانیا مہ یادی ہائے کی مہ ریوالوٹ کارڈہ وی ائی پی لاونجو جم آفر شیر۔ بریک ای بریک، ای ہیہ وی ائ پی لاونجو دی لاڑیسی رے ہتے انٹریو گانی اوتیتام۔ ہتے اندرینی ژیبیک پیک سف مفتہ وا اشناری دی کافی بو اوشونی۔ عام طورہ روچی دریکہ ہاݰ ہمہ جانہ بین بوئے نست کھیو ژیبوم رے تھے اوا دی دنیو ہتے پیلیٹہ دیتی تول کی راغیلی دے رے تھے سورو پوری پھریتم۔ ہتیسوم اݰکامہ اختی بیکو ملگیریاننتے کال کوراو ہتیتان پاشیتم ہموݰ معاملہ ہیہ اندرینی رے۔ خائے تھے ہاݰ بیتی کاھاکو پونجو ڈیکو ݯھݯھاوا اعلان ہوئے کی اٹلیو جہاز تیار ہوئے رے۔ ہتے ڈیکو سار نو بیتی گیٹہ توریکہ پت تو ژوتی کھوڑان اف نیساوا ہتے ڈسبینو پیسی بی جہازی نیشتم۔ 

لندناری بارگامو اٹلیوتین جو گھنٹو فلائٹ اوشوئے وا جہاز سستہ بیکین دیتی یارخونو لینڈکروزیران غونہ ترانگ سیٹ مگم نراولوتین کیا قراوال خائے ݯتوسوم اوریریرو بیراتم۔ ہتیسوم البت تھمامو قوریرو بوم اف نیساوا مہ گوݯو ہتے روئے مہ دش نور غیچی دیاو اوشونی۔ جہازہ اف خومی ہتے نفریوتین کال ارتم کوسوم کی ایر بی این بی ۳ بس حل باو اوشوتم۔ ہانیا ہسے توریتائے تان موٹرو گانی۔ کورا مارکیٹینگہ کوروم کوراک ایٹیلین موش اوشوئے وا ہسے اوچو ہتو پارٹنیر ای بیتی حل بونیان۔ تان دورو ای کمرو ایر بی این بیا لاکھی ہتیغاری پیسہ گانینیان۔ ہیہ کورمو ݯھترارتو دی شورغیلیک کوریکو کی رشتہ دار مینو ہیہ زمانہ کھاربلہ بیکو مینوان ختان خالی پیسی شینی۔ خائے تھے سے پھوک انگریزی باو اوشوئے وا راہو موژی زبردست مہ مشقول اریر عبدال ریاو۔ اٹیلیان باریا مشہور کی ہتیت لوو دیاوا ہوستان بو کیژیبینی رے، ہیس مہ کارہ اوشوئے مگم ہیہ موش گاڑیو کاساوا اٹلیو اشتھکاو موژو دیاو کھاڑ ہوستان کیژیباو اسٹیلنگو لاکیکو مہ ہردی نسی بوغاو اوشوئے۔ ہاݰ کوری مہ تان دورہ تارے مہ کمرو مہ پاشیتائے۔ ہتو پارٹنروتین انگریزیو پھور نو گیاو اوشوئے ہتو سوم نیمے بشاراول اریتم وا ہتے موش گیاوا سف لوٹ ژاغان مہ پاشیتائے کی ہیرا بی سودہ گانیسی ہیہ ہوٹل وغیرہ رے۔ کورہ چارو ٹیکہ دیہ غونی ژاغہ اوشوئے ہے دوور وا ݰویہ ای ہوٹل تان۔ ہتو بو اݰتھیکیکو ہتیرہ ݰاپکوتین بغاتم۔ ݰاپک جم اوشوئے مگم روئے بو ݰوخ بیرانی۔ خائے ای لوسیکو باݰ ݰاپیکو انگیتی پچاس یورو مسار گانتانی۔ مہ اݰکامو دی کیا خاطرو نو ارینی۔ خائے تھے خسمت چوڑینی بی راست ہوتم۔