Italy Travel Diaries

اٹلیوتین کوسیکو جوو قسط: محبتو شہر ویرونہ

بوتہ تان مہ ہتے ایر-بی-این- بیو میستو میکی اوچے بیچی متین لوو دیتی اسیتانی کی ہتیت ۹ بجہ تان تان کورمانتین بینی ہتیغین دیتی مہ دی ۹ بجاری نست اف نیسیلک بوئے رے۔ دنیا مہ دِش اشناریان موژی الارمو ہواز ہنیسین دی اولانو لمبارا شیر۔ خیر تھے ولاغبیلو اہئی روپھی تیار ہوتم۔ لوڑتم کی ہتے میکی میلانو کاغذی میپان څوپ کوری مہ میزہ لاکھی اسور۔ خائے یا جم زمانہ کا کاغذی میپ لاڑیران رے قافیہ کوریکو تان قصو اریر کی ہسے کاغذی میپہ لوڑی اٹلیار پولینڈوتین بوغدو بیرائے گاڑیو گانی تان جوانیہ۔ اوا تان موبائیلو یی گانی گوگل میپو آن کوری اف نیساتم۔ ہنون ۱۲ مارچ یعنی مہ اژیکو انوس اوشوئے وا اوا محبتو شہر ویرونو ݰویہ تان اسیتم ہتیغین دیتی ویرونہ رے ہے شھروتین راہی ہوتم۔

‎اف نیسی ہتے گوݯہ ای دکانہ بی میلانو ریلو اسٹیشنوتین بسوتین ٹیکٹ گانیم رے ہتے دوکانداروسوم انگریزی کوریکو کیا داراکہ تان نو پرائے۔ تھمامو روئے ہاتی اسیتانی مگم کوستین دی انگریزی نو گیاو اوشوئے وا متین اٹیلینو پھور نو گیاو اوشوئے۔ تھے عذابہ پولی توتین نیمے ہݰ کوری ٹیکٹ متین تاریتائے۔ اللہوتین پتہ تیت صحیح ٹیکٹ اوشونی دیا نوا مگم بسہ کا لوڑیتانی نو۔ یورپو اکثر ژاغین ٹیکٹان نو لاڑینی بلکہ سواریان سورا بھروسہ کونی کی ہیت خواہ مخواہ ٹیکٹ گانیرو بونی رے۔ موژو دیاو کورا یکہ دوکہ لاڑینی۔ اکثر دفعہ پاکستانی ملگیریانان سوم یورپی کوئی بوغاوا پوشی اسوم کی ٹیکٹان نو لاڑینیان رے ٹکٹ نو گاناو تان موٹری نیشیرو غون نیشینی۔ ای زمانہ جرمانی ہݰ کوریکو ای ملگیریو دیخ جیلی دونی اللہ اسپہ بچ اریر۔

خیر تھے ہیہ ویرونہ رے شہر میلاناری ۲ گھنٹو پونہ شیر۔ ٹیکٹ گانی جو منزلائی ریلی نیشاتم۔ روئے سف ماسکان راو راو کوری نیشی اسیتانی۔ ہے انوس یور اوشوئے وا موسم جم بیکن ہر کا خوشان خوشان ساراو اوشوئے۔ یورپ ریکو اسپہ عام طورا مو کیاغ جاݰوسی مگم موسمو لوو کی ہوئے بروغل ہمو پروشٹہ جنت۔ ویرونہ توری پھوک ہتی کوسیکہ پھریتم۔ مہ سوم ای خور ملگیری دی جوست ہوئے کوس کی کورونو شونجو کارڈ ایکسپائر بیرو بیرائے۔ دی کورا بی کیاغ لوسیسی رے ہیرا ہایا ۱۰ ژاغہ بغاتم مگم قانون ہانی مضبوط کی ہے کارڈار غیر ہوٹلی نیشیکو تان نو لاکیتانی۔ دونی دِش سوستی دی ساریتائے خائے یہ ݯھوئے کوراوا ݰاپک کا تاتین نو دونیان پیسو بچین دی۔ ملگیریوتین ریم کی ہموݰ بیکو پیڅھی پاکستانی بی ہل بارو گویان کیا خائے ای ڈونگہ ݰاپکو بچین کا دی تہ ہانی خوار نو کونی لا۔ خائے تھے لوڑی لوڑی ای پاکستانی کباب والا دوکان لیتم۔ ہاتو ݯاکے پھوک ݰاپک پیک کورے پارکہ بی اویوتم۔ ہتے پارکو موژہ گھاس ݰئیلی سارے ہتے موژہ نیشی اسیکہ پولوسان گیتی اسپہ نیتانی کی ہیرا نیشیکو اجازت نیکی رے۔ خائے ہتے جو لوسنوکو دی اسپہ اف بیکو بݰ نو ارینی۔ اسپہ ہتے گوݯہ بینچہ گیتی نیشیکو ای اسپہ رنگو موش یی کوری اسپاتین اشارہ کویان کی بوغور ہیرا بی نیشور اوا ہیہ اسوم پساتین کا کیا نو رینی رے۔ جم تو لوڑتم کی ڈیکو دی چھینی اسور ویتھوکو سوری پوری ہتیرا اسور۔ اسپہ ریسی کی نہ پولوسان اسپہ نست درانی نہ کی تہ اسپہ بچ کوریکو بچین ہے اچتو دیلیک بار۔

خائے تھے ہنیسین ہتے ژاغوتین بغاتم کی کھیو بچین کی ویرونوتین محبتو شہر رینیان۔ اصلہ انگریزی زبانو بو لوٹ ادیب شیکیسپئیرو ای مشہور کہانی “رومیو اوچے جولئیٹو” کردار ہیہ شہراری اوشونی۔ ہتیتان دورو رویان موژی دوݰمانی بیکن دیتی ہتیت تان محبتہ کھمیاب نو بیتی ای بیتی اوبریتانی۔ ہیہ سورا فلم دی شیر وا بو نیوشی دی اسونی کا کی مزید ہیہ باریا ریک مݰکیتامی۔ ہیہ شہرا جولیئٹو دورو ہنیسین کوساک دویان بچین ای پرکشش ژاغہ ساوزے اسونی وا ہتیرا گیاو روئے تان خوش رویان سوم فوٹو نیزینی۔ ہتیرا ہتے بالکونیو پوشیتم کورا کی جولئٹو چے رومیو ایغو پوشاو اوشونی۔ ہے ژاغو بو ݰیئیلی کوری ساوزے ٹکٹ گاناو اندرینتو لاکونیان وا محبتو پیغام ہوستہ سوئی ہتی دکانہ شینی بیزیمیکو بچین۔

ہتیسوم ویرونوتین کوسیتم۔ بو ہردی ݯوکونو گانزول شینی وا کوساک دویو ٹِپ۔ ای لوٹ اسٹیڈیم غونی ارینہ دی شیر کیاغ کی ای صدیہ ساوز بیرو بیرائے۔ اٹلی پرانو آبادیا مڑاغ وا ہمیت تان رومن تاریخو بو جم کوری حفاظتو کوری اسونی۔ ہے پارانو شہرو لوڑی بوت بیکو اچی ریلتو نسی میلانہ تورتم۔ ہتیرا توری بسو کیا ہوݰ نو ارتم۔ بس سٹاپ لمبر نو نیوشی اوشونی۔ ہی ہائی کوسی ہتے بسو نو لے اوبر گاڑی مݰکے تان ژاغوتین بغاتم۔ مائدو مل بیتی ہاتی پھریتم۔ چھوچی روپھی وا ای خور ژاغہ ݯھتراریان بستیا بوغیلیک اوشوئے ہتے لووان اچی قسطہ دوسی۔