متین سریران

ای کمہ وخت پروشٹی ای کایو ویڈیو وائرل بیتی اوشوئے۔ ہتیرا ای برار ہتے کایو سار بشار کویان کی پوشیوتین انگریزیا کیاغ ریر ریکو ہسے جواب دویان کی “کیٹ مت سریران”۔ ہے قسمہ تمام سوالان جوابو صحی دویان مگم ہر جوابو اخیرہ مت سریران دی ݯاکیران۔ ہے سوم جوستہ سوال بشار گاناکوتین دی ریران کی تو دی مت سریران راوین رے۔ اسپہ سف ہے ویڈیوو پوشی خوشان ہوتم مگم ہے کائے اسپاتین بو لوٹ سبق دی پرائے کی ہو جواب صحی بیکو باوجودہ دی مت سریران رے ہیس تان علمو سورا ناز نوکویان بلکہ ہے گنجائشو بیہچیران کی ہورو مطابقہ ہے سوالو جواب ہاݰ شیر وا ممکمن شیر کی ہیس صحی نو دی بوئے۔ 

ہنون زمانہ تعلیم عام بیتی شیر مگم علم انسانو مغرور دی کوری شیر۔ ای بندہ ای ڈگری گانی یا ۳ کتابان رے ہتوتین سریران کی کل جہانو علم ہتو سوم شیر وا ہسے کوستین خومیکہ روادار نو۔ مہ حسابہ علم ہسے کی کھیو کی تو ہمونیہ پت ہوݰ نوما کوروس وا ہے سخین دیتی انسان ہمیش علمو اچتو ݯوکی حال بویان۔ کیا انوس کی انسان تان سورو پورا ہوݰ کوراک جوݰیتائے ہتے انوس ہسے عالم نو ہوئے بچونکہ علمو دواحتان تان بچین ݰیت اریر۔ کہوار شاعریا جلال الدین زنگی صاحب ہیا لوو بو ݰئیلی اندازہ دیتی اسور کی:

علمو دریاہ ݯُھوݯُو نو بوئے رانہ ران بوئے زیاد مگر 

عمر بغائے کامل نو ہوت بسار بسوت پھتوکی تان

ہیا کیا ݯھترارو مشقولگی تان نو، پورا دنیا ہیہ سورا بحث کاسیران۔ اکثر ہاݰ جوݰونو بویان کی سائینس کیا لوو کی دویان ہتے لوو ہمیش صحی رے۔ دی سائسدانان تان موژاری “سائنس ٹیکنالوجی اینڈ سوسائیٹئ (ایس ٹی ایس) رے ای مہم شروغ ارینی کی ہتیت سائنسو “ابجیکٹویٹیو” (یعنی کی سائنس کیا دی قسمہ انسانی غلطیار یا تعصبار پاک) یا پازیٹویزمو چیلنج ارینی۔ ہے موژی بو اسکالر اسونی مگم ڈونا ہاراویے تان مشہور تھیوری “گاڈ ٹرِک” (یعنی کی انسانو خدایو غونہ عمل کوریک) زریعہ ہیا لوو پروشٹہ آلائے کی ابجیکٹیوٹی مغربی کولانا پدر شاہی نظامو ای  پیداوار کی ہسے ہاݰ جاݰوران کی محقق پورا غیر جانبدار بیتی مشاہدہ کوری “ٹروتھ” یعنی ای صحی علم پیدا کوریکو بوئے۔ ہیس ۱۹۸۸ ہے لوو پروشٹہ الائے وا ہیغار اچی ایس ٹی ایس اسکالر وا خور روئے علمو کامل نو بیکو حوالہ مشقول باو گونیان۔ خور کوس لوو نو دوسی، فیزکسہ نوبل پرائز گانیرو ساول پرلموٹر ۲۰۱۱ ہموݰ ریران کی “ سائنس اسپاتین ہیا لوو ہوݰ کوریکہ مدد کورویان کی اسپہ ہمیش صحی نو رے”۔ ہنیس بو امبوخ سائنسدانان دی ہے لوو منینیان کی سائنس بدل باک اشناری وا خور علمو غونہ سائنس دی پھتوکی علم۔ 

جون ایلیاء برصغیرو بو لوٹ نام وا ای بو جم شاعر وا ادیب دی۔ ہسے تان مضمون “طلبہ” ریران کی “ کا کی یقین لاکھویان ہسے زندگیو “اگاہیار” محروم اسور وا کا کی ہے دعوی کورویان ہسے دریدہ دہن۔ بعضی نوجوان دانش گاہوتین بینیان، ہیتان موژار پھتی ہتیت اسونی کی ہتیت واقع اشناریان ہوݰ کوریکو بچین قاق اسونی وا پھتی ہتیت اسونی کی ہتیت دورار تان یقینو پٹارو تان سوم گانی بینیان۔ ہتیت نستاری تان ہر لوو طے کوری لاکی اسونی ہتیتان بچین جم نو بویا کی ہتیت راہار تان اچی گونی۔ کا کی ذہنو تختیو نستاری تان نیوشی ݰا کوری اسور ہتیت دانش گاہا کپھالو کوچھیاو بینیانا؟ اگر کی تو نست تان ای کمہ لووان گانی صحت اوچے صداقتو سورا شوت چھوئی پھار نیسی اسوس، تاتین علمو کیا ضرورت؟” اسپہ سبق راک وا سبق راردو دی ہاݰ بیتی اسوسی۔ خور کوس لوو کار کوریکوتین تیار نہ تان موژہ ہیا صلاحیتو بیہچیسیان کی اسپہ خور مواد رے یا خور کوس لوو کار کوری کیا نوغ کیاغ ݯھیݯھیکو بوسی رے۔ اسپہ سبق راردوانتے ای لوو ہیا دی عجیب ساریر کی اسپہ تان علاقو سبق نو راردوان ساری دی کیاغ ݯھݯھوسی رے حالانکہ اسکولہ کیاغ ݯھݯھوسیان کیاغ کی زندگیو اسکولہ ݯھݯھین بویان۔ علم مکمل نو بوئے وا علمو کیا دوور نیکی۔ علمو بچین ہمیش تان سورو تیار بیہچاک روئے تعلیم یافتہ وا کا کی پژالو دواحتو اوچے یونیورسٹیو کلاس رومو تان بچین برابرو دانش گاہ جاݰوران ہسے طالب علم۔ ہیا کیا شرمو بݰ لوو نو کی اسپہ خور کوسار نوغ کیاغ ݯھیݯی تان سورو بدل کوروسی بلکہ المیہ ہیس کی اسپہ تعلیم یافتہ رے تان سورو ہوݰ کوراک جوݰی خور کوس لووان کارو شانی نو لاکوسی۔ متین ہموݰ سریران، پساتین کیاغ ساران؟