خور ژاغین ݯھوئی روئی آختی بیکو بچین اِݰکار کونیان، ݯھترارتو آختی روئی غیچھان چھوئی کوری بو فخرو سورا تانتے کوروم جوݰی نسل کشی  کونیان۔  لوو دیکو اسپہ امن پسند۔۔ آمن وا ہاݰ باک بیایا کی تان شوقو بچین ای خور خدایو مخلوقو ماریس۔ خدائی انسانو دنیا خلیفہ ساوزے اسور، وا خور تھمام مخلوقان انسانو ہوستہ دیتی اسور مگم کیا خلیفہ اسپہ غونہ بویا؟ تان دوری کیاوت سف مالان او چو کہاکان ای انوس ای گانی کوݰی نیشیسیانا خدائی حلال کوری اسور رے؟ کی نو دنیاری بویکرا اوچو خور ژاندار ختم باو گونیان ہیتان کھیوت حلال رے ہانی بے دردیا قتلِ عام کوسیان جبکہ ہے اِݰکارو پوشورو سار غیر دی اسپہ دوری ژیبیکو بو کیاغ شیر؟ لوو بو شینی مگم کیا فائدہ، اسپہ سف تان غیچھان تپ اف نیشے اسوسی۔

اسپہ ہیہ بے دردی کی بیہچیتائے ای کمہ سالو موژی ݯھتراتو وا غیچہ تاریکو آڑی اوچو کالیکور لین نو بوئے۔ ہیہ کیا افسانہ نو، دنیاری کندوری بو ژانوار ختم باو گونیان وا اسپہ دی تان لالچو سورا قابو کی نو اریتم ہیہ لوو دی حقیقت بوئے۔ بو نفریان ہیہ بحث شیر کی اسپہ تت باپ اݰکار کوری گیتی اسونی رے۔ ہے لوو ہتیغین غلط کی نست زمانہ پورا دیہہ جو یا تروئے تھویک باوتانی مگم ہانس ہار اژیرو نو اژیرو ہوستہ تھویک شیر۔ اسپہ تت باپ اݰکار کی کوراو اوشونی ہتیتان ضرورت دی اوشوئے کوریکو کی دوری نفکت نو باوتائے مگم ہنیس ہار ژاغہ خوراکہ بوکی مگم اسپہ وا دی ہیرا بی سفرہ اسیرو آڑیو ماری انگیتی ژیبوسیان۔ اسپہ تان گیاک نسلوتین کیا جواب دوسی اگر کی تاریخہ ہیا لوو نیوشونو ہوئے کی ݯھرار رے ژاغہ چھت دیتی آڑی ہتو دیکو پیسی ہتیان نسل کشی ارینی رے۔ تان دونی پھوک فکر کورور۔ اسپہ گیاک نسل خدایو پیدا کاردو ݰئیلیو پوشیکار کی محروم ہوئے ہتو گناہ دی اسپہ سوری گوئے۔

ہیا کوروم اسان نو۔ مہ دوری دی سف اݰکاری وا اوا ہتیتان تان منع کوریکو شاید نو بوم مگم تان سار اچی گیاک نسلوتین تھویک دیکو ژاغہ ژانداران وا بوئکران سوم ہمدردی کی دیکو بیتم سخت ثوابی بوئی۔